Baddha Padmasana
बद्ध पद्मासन हे बैठकस्थितीत करायचे योगासन आहे. हे योगासन पद्मासना प्रमाणेच करायचे असते फक्त यात पाठीच्या मागून दोन्ही हातानी मांडीवर ठेवलेल्या पावलांचे आंगठे धरायचे असतात. ज्यांचे शरीर लवचिक आहे त्यांना हे आसन चांगले जमते. रोज सराव केल्यास हे आसन करणे शक्य होईल. ह्या आसनात छाती, पोट, पाठीचा कणा, हात व पाय या अवयवांवर ताण येत असल्या मुळे स्नायूंची कार्यक्षमता सुधारते.
आसन प्रवेश
बैठकस्थितीतून या आसनाची सुरुवात होते. (योगासनांचे ४ मुख्य प्रकार व पूर्व स्थिती या पेजवर बैठकस्थितीचे वर्णन केले आहे.) दोन्ही पायात साधारण एक फूट अंतर ठेवून उजवा पाय गुडघ्यात दुमडून डाव्या पायाच्या मांडीवर उजव्या पायाचा चवडा ठेवा. आता डावा पाय गुडघ्यात दुमडून उजव्या पायाच्या मांडीवर डाव्या पायाचा चवडा ठेवा.आता डावा हात पाठीमागून घेऊन उजव्या मांडीवर ठेवलेल्या डाव्या पायाचा आंगठा धारा. आता उजवा हात पाठीमागून घेऊन डाव्या मांडीवर ठेवलेल्या उजव्या पायाचा आंगठा धरा. त्याचवेळेस पाठीचा कणा ताठ ठेवा. मान ताठ देवा. दृष्टी नाकासमोर ठेवून एकीकडे संथ श्वसन सुरु ठेवा. ही आहे पूर्ण आसन स्थिती याच पूर्ण स्थितीमध्ये किमान अर्धा ते एक मिनिटे बसण्याचा सराव करावा व तो थोडा थोडा वेळ रोज वाढवत न्यावा. हे आसन उजवा पाय आधी दुमडून केल्या प्रमाणे डावा पाय आधी दुमडून पण करता येते.
पूर्ण आसन स्थितीतून मूळ बैठक स्थितीत
सर्व प्रथम उजवा हात सोडून उजव्या गुडघ्यावर ठेवावा. नंतर डावा हात सोडून डाव्या गुडघ्यावर ठेवावा. नंतर डावा पाय गुडघा ताठ ठेवून लांब सरळ करावा. तसाच उजवा पायही गुडघा ताठ ठेवून लांब सरळ करावा. दोन्ही पाय जुळवून मूळ बैठकस्थितीत बसावे.
बद्ध पद्मासन केल्याने मिळणारे फायदे
ह्या आसनात पाठीचा ताठ कणा व दोन्ही हात व दोन्ही पाय ताणलेले असल्यामुळे शरीराचे स्नायू लवचिक बनतात. पाठीच्या कण्याची कार्यक्षमता सुधारते. मन शांत व स्थिर होते. झोप चांगली लागते. हे आसन नियमित केल्यास शारिरीक व मानसिक दोन्ही दृष्ट्या फायदेशीर ठरेल.
वरील लेखा बद्दल आपला अभिप्राय जरूर द्या. वरील विषया संदर्भात काही अधिक माहिती हवी असल्यास किंवा विषयाला धरून एखाद्या नवीन मुद्या बद्दल माहिती हवी आल्यास आम्हाला जरूर कळवा; आम्ही लवकरात लवकर योग्य माहिती aarogyasakha.com वर प्रकाशित करू. आमची वेबसाईट पाहिल्या बद्दल आपले मनापासून आभार.